Monday, February 28, 2011

How Dare You?!!

I dedicate this to all Egyptian Revolution supporters living in the Gulf states

ردا علي كل من إنتقد أو إنتقص من مؤيدي ثورة 25 يناير من المصريين في الخارج...
.
أنا: الأنا هنا و إن كانت عني (أنا كاتب هذه السطور) و لكنها أيضا تضم كل مصري مؤيد لثورة 25 يناير من المصريين المقيمين في الخارج و خصوصا المصريين العاملين في الخليج الذين ساقهم حظهم العثر"المهبب" لسماع مثل الهراء الأتي ذكره.

إنت: إنت هنا تنطبق علي كل ذكر (أو أنثى) سمح لنفسه أن ينتقص (بلبلدي كده "يلسن") علي أنا (ومن هم مثلي من مؤيدي ثورة 25 يناير من المصريين العاملين في الخليج خصوصا) تحت بند "إنت عمال تسخن و إنت مش عارف الدنيا هنا عملا إزاي" و "إنت أصلك متعرفش" وأي نوع من الإستخفاف و الإتهام الصريح أو المبطن إني أجلس هنا في الخليج في التكييف و يعتقد إني "بق" و "كلمنجي" و عامل فيها ثورجي علشان أنا بعيد و إني لو كنت في مصر، كنت حستخبي في البيت و أسكت ساكت (و أظهر علي حقيقتي إلي هو فاكرها عني).

الرسالة دي كنت عاوز أكتبهالك من بداية الثورة. لما كنت أنا بشجع الثورة و فجاء’ لقيتك يا إما مش مع الثورة أو مش عاوز دوشة... لأ و إه وصلت بيك الوقاحة إنك تديني كلمتين من إلي ذكرتهم فوق. دا طبعا غير التلميحات و الهمز و اللمز على، في حين كنت سيادتك ما قدمتش حاجة طول وقت الثورة.

أحب أرد و أقول لك يالي متهمني إني "بق" و "كلمنجي" و إني عامل أسد علشان في أمان هنا (في الخليج)... إني (و أمثالي) و إن كنت خارج مصر و لكن بعد علمي بما حدث يوم 25 يناير و أنه هناك إتجاه في مصر لخروج إحتجاجات ضد النظام يوم 28 يناير "سخنت" كل المصريين الي أعرفهم هنا و قلتلهم إني رايح أتظاهر أمام السفارة المصرية هنا يوم الجمعة 28 يناير.
مع العلم إنه في الخليج...
معناش تصريح (لو كان فيه حاجة كده أصلا)
المظاهرات هنا ممنوعة تماما و ليست شيء مقبول
أعداد المصريين ليست كبيرة حتي نشجع بعضنا و نحتمي ببعض
لوحد إتمسك بيتطرد من البلد

ولكني خرجت و تعرف كام واحد من المصريين إلي أعرفهم جم المظاهرة؟ 2 و لقينا واحد كمان لما وصلنا هناك. عدد المتظاهرين كان قليل بالعشرات. يعني ممكن نتلم في ثانية واحدة و نطرد من البلد. و لعلم سيادتك إني كنت فعلا حتشد من أمن العاصمة فعلا بعد لما سخن عليا ضابط من بتعهم لولا ستر ربنا.

عامل فيها بطل؟ لأ،الأبطال هما إلي في مصر، إلي هزموا الشرطة.. إلي ماتو و إلي دافعوا عن الثورة لحد يوم التنحي. بل وإني لا أنكر إني كنت خايف و أنا رايح المظاهرة... بقدم رجل و أخر رجل... بس رحت. رحت لأني كنت حموت، نفسي أبقى مع أهلي في مصر في المظاهرة ضد النظام الفاسد!

مش بس كده سيادتك...و أنا في المظاهرة مراتي كمان بعتتلي رسالة تقولي إنها جية تتظاهر معانا (و تركت العيال مع صديقة) و بعد خناقة و نرفزة مني عليها (خوفا عليها) عارف يا "روح أمك" قالتلي إيه و من بعدها سكت؟ قالت لي: "أنا عاوزة أساند بلدي، أنا عاوزة أقف مع أهل بلدي، مش إنت بس إلي وطني و نفسك تعبر عن وطنيتك... وأنا كمان !"
مراتي يا "دكر منك له" الي طلعت أرجل منك و من أمثالك... حطتت حياتها الهانئة هنا علي كفها (مع إحتمل الطرد من البلد) بس علشان تعمل حاجة رمزية علشان بلدها و أهلها و أخوتها إلي وقفوا في التحرير و السويس و كورنيش الإسكندرية علشان كرمتي و كرمتك. في حين إن سيادتك كنت قاعد في البيت تمصمص شفايفك وأنت بتتفرج من البيت علي الثورة مع كباية شاي، في الوقت الي الباقيين في شوارع مصر بيكتبوا التاريخ.
و جي بعد كده تلسن عليا؟!

ما بتحبش المظاهرات... حقك، لك رأيك و أنت حر فيه و ممكن نتناقش فيه بتحضر.
ما بتحبش الفوضي بسبب الثورة... حقك، لك رأيك و أنت حر فيه و ممكن نتناقش فيه بتحضر.
ما بتحبش الثورجية... حقك، لك رأيك و أنت حر فيه و ممكن نتناقش فيه بتحضر.
ما بتحبش التغيير... حقك، لك رأيك و أنت حر فيه و ممكن نتناقش فيه بتحضر.
بتحب حسني مبارك... حقك، لك رأيك و أنت حر فيه و ممكن نتناقش فيه بتحضر.
بتحب الوضع القديم... حقك، لك رأيك و أنت حر فيه و ممكن نتناقش فيه بتحضر.
إنما تقل أدبك و تلسن و تشكك في (و أمثالي) تحت بند إني "بق" و لو كنت في مصر كنت حبقي قاعد في البيت زي الجبان... لأ... جت كسر حقق... يا......يا إبن ال....... (أرجو ملء الفراغ بكل ما تستطيع إضافته من ألفاظ معبرة!)

أهدي هذه الرسالة إلي كل من تعرض مثلي لما ذكرته... لو حد ألك الكلام ده، حت الرسالة دي في بقو! (مشيها بقو)
Mood: Pissed

2 comments:

hend...hanady said...

احب اعرف حضرتك ان زى ما فى كده فيه تانى بيقولكم ما احنا بره وجوه متبهدلين كفاية اننا بنتعامل زى العبيد بره والكفيل يمرمط وغيره واسفنة حتى من المصريين نفسهم بسبب لقمة العيش اللى خلتنا نبيع كرمتنا وبقى الكل بيدوس علينا فالحمدلله فيه ناس كتير مقدرة اللى بيحصل بره وعارفين ان ايه اللى رماك على المر قال اللى امر منه يعنى انت كنت لقيت عيش فى بلدك وقلت لا

هو اللى حاصل مش لفئة معينة بس اللى حاصل ان فيه السن كتير طلعت اى حد ضدها يبقى عميل وانت مش هتزايد على وطنييتى وانا كنت فى التحرير وانت كنت فين وانا بس اللى عارف مصلحة البلد واسكت انت
وكل واحد بقى بيتكلم كأنه معاه تفويض عن 85 مليون

مش اللى بره بس كمان اللى جوه بيتقال لهم الكلام ده وبقى بيتمارس علينا نفس السياسة اللى كانت بتتمارس قبل كده احنا بس اللى نعرف واحنا اللى هنقول واتركن على جنب

كفاية اوى اقتراح التصويت من على النت اللى بيلغى ويهمش طبقة الفلاحين والعمال وفقراء مصر وبدو وكان مصر للى معاه نت وموبايل بيدخل على النت بس مش بقيت 85 مليون

Fadfadation said...

KOl 7ad 7a2o ye2ool ra2yo...bas min 3'eer ta7'ween... that's the point