Thursday, June 27, 2013

إخواني يحاور نفسه الثورجية...

كالعادة دايما نركز علي النتيجة و مش الأسباب الي و صلتنا للنتيجة
.
الإخوان (ومن معهم) زعلانيين على الى مات منهم في المنصورة (كلنا زعلنين طبعا لأن دول مصريين) و زعلانين إن الناس بتتمرد علي مرسي و عليهم  من غير ما يسئلوا نفسهم سؤال مهم...
إيه الي و صلنا لكون كل الناس دي ضدنا؟
و ليه صحاب إمبارح إتمردوا علينا؟

"الهزيمة عادة بتكون بسبب أخطاء أنا عملتها، قبل ما تكون بسبب قوة خصمي"

مراجعة بين الإخواني و نفسه الثورجية:

تعالى نراجع الشريط من الأول كده...
النفس: كان حال الأخوان إيه في البلد بعد الثورة؟
الإخواني: كنا زي الفل. محبوبين و الناس متعشمة فينا خير.
النفس: كان حالكو إيه مع زملائكوا الثوار من التيارات التانية؟
الإخواني: آه, كنا حبايب و قلنا إن البلد تكفينا كلنا، لحد...
النفس: لحد إيه؟
الإخواني: يعني إختلفنا على الإعلان الدستوري
النفس: وقلتوا إيه وقتها؟
الإخواني: قولنا إحنا و حلفائنا للناس: قول "نعم" لحماية الشريعة الإسلامية و "غزوة الصناديق"
النفس: و بعدين؟
الإخواني: دي تقريبا عدت، لحد لما...
النفس: لحد لما إيه؟
الإخواني: يعني، قلنا كام حاجة معملنهاش
النفس:  زي إيه؟
الإخواني: "حندخل ننافس على 35% من البرلمان بس" و "مش حنترشح للرئاسة" و شوية حاجات بسيطه كده
النفس: و بعد كده؟
الإخواني: خدنا البرلمان قمنا قلبين علي زملائنا الثوار من التيارات التانية
النفس: وقلتوا إيه وقتها؟
الإخواني: قلنا "إيه الي وداهم هناك" و "يا واد يا مؤمن
النفس: و بعد كده؟
الإخواني: من وقتها و إحنا بنتنك و نحتكر السلطة، ما إحنا الأغلبية و الأقوى على الساحة
النفس: و بعد كده؟
الإخواني: كسبنا الرئاسة
النفس: و بعد كده؟
الإخواني: يعني كان فيه ناس عصرين على نفسهم لمون و إنتخبوا راجلنا
النفس: و بعد كده؟
الإخواني: إختلفوا معانا في طريقتنا في الحكم  و "الإعلان الدستوري"و أداء راجلنا
النفس: وقلتوا إيه وقتها؟
الإخواني: إتهمنا الكل (الي مش من رأينا) بالعمالة أو الفلولية أو الفسوق أو حتى الكفر
النفس: و بعد كده؟
الإخواني: قعدنا ننكركل يوم إن شعبيتنا بتقل ... دي يا جماعة كانت بتزيد. ده إحنا الي معايا الصناديق!
النفس: و بعد كده؟
الإخواني: نزل في يوم عدد هائل مننا و شلفطنا الهمج (الثوار) بتوع الإتحادية... هما فكرين إنهم يشتموا راجلنا و إحنا نتفرج. كان لازم تأديبهم
النفس: و بعد كده؟
الإخواني: يعني "سحرة فرعون" قعدوا يكدبوا علينا و يتهمونا بحاجات ظلم و يتلككوا للحكومة و الريس
النفس: يتلككوا إزاى يعني؟
الإخواني: يعني "ناسا" و "لخبطة القرارات" و "فضيحة بث المؤتمر بتاع مياه النيل و سد أثيوبيا" و "تعالي و أنا أقول لك" و "وزارة الثقافة"... حاجات بسيطة يعني"
النفس: و دلوقتي إزاي الحال؟
الإخواني: إتلموا كلهم ضدنا... جيش، شرطة، مسيحيين، ثوار ، حزب كنبة، لبراليين، علمانيين، و غيرهم
النفس: غيرهم مين يعني؟
الإخواني: يعني... مسلمين كده بس بالإسم..."وخدين الكفر ملة و دين

النفس: بقي يا راجل بعد كل ده، و أسلوبك مع الناس ده و مش عايز الكل يقلب عليك؟
مش كان أولى تفضل إيدك في إيد زمايلك الثوار من الأول كان زمنكوا عديتوا مع بعض بسلام؟
يا راجل ده إنتوا خليتوا حزب الكنبة يترحم على مبارك. و أادي الفلول شموا نفسهم تاني. ده يا مؤمن في ناس فلول بقوا عاشين دور الثورجية. شفت الهنا الي بقينا فيه؟
و أرجع أفكرك تاني: "الهزيمة عادة بتكون بسبب أخطاء أنا عملتها، قبل ما تكون بسبب قوة خصمي

الإخواني: أنا متهزمتش! "كله إلا مرسي"... "ده معاه الشرعية" "دونها الرقاب" "حتضيعوا الثورة

النفس: حسبنا الله ونعم الوكيل فيك يا شيخ. جبتلي شلل

Mood: Mashlool min el kalam ma3ahom :S

Thursday, March 21, 2013

عن الخرفان و النعاج و أنا... كفاية!

بقالي فترة بفكر بهدوء في المشادات و المشاحنات الي بين الناس علي الفيس بوك أو وجها لوجه (ولي أنا منكرش طبعا إني كنت طرف فيها مع ناس) أو الإعلام بسبب السياسة و غيرها.

و بغض النظر عن مين صح و مين غلط في كل حدث علي حده، بس عمال يجي في بالي كلمة موجودة في الحديث ده:
"أربع من كن فيه كان منافقاً خالصاً، ومن كانت فيه خصلة منهن كانت فيه خصلة من النفاق حتى يدعها، إذا اؤتمن خان، وإذا حدث كذب، وإذا عاهد غدر، وإذا خاصم فجر."

"وإذا خاصم فجر"
الكلمة دي قلقاني شوية علي نفسي و علي ناس كتير بحبهم و بخاف عليهم (أهل، أصحاب، أحباب... الخ).

لاحظت أننا بقينا مش موضوعيين في أحيان كتيرة (وأنا منهم) و بقينا علي إستعداد نصدق أي هتش (أي كلام) وأتهامات بدون دليل بس علشان بنكره شخص أو جبهة أو حزب . زي مثلا السولار مختفي لأنه كله في غزة (علي أساس إن غزة أو تعدادها أد مصر و تعدادها!) أو الكلام عن صهيونية البرادعي العميل أو اد إيه عيلة ساويرس حرامية ... و كل الاتهامات الي مثلها و الكلام مطلق بدون دليل (دليل قاطع مثبت من مصدر موثوق أو حكم محكمة).

لاحظت أننا بقينا بنتريق (وأنا منهم) علي الأشخاص بمنتها البساطة زي الكلام عن الخرفان أو عن الخنازير و النعاج. و الأسواء إننا بقينا بنلسن حتي علي البيوت و الأعراض زي التلسين علي بنت البردعي أو أم أيمن أو ام كباسين و ابو حملات و ابو جهل (خيرت ولي معاه) و سلطانية مرسي و لبس عبد الناصر و ناس تانية ياما.

لاحظت أننا بقينا بنشوف العدل و الحق و المساواة  في القصاص بعين أه و عين لأ (وأنا منهم). زي حرق مقرات الإخوان مثلا أو ضرب المتظاهرين عند الاتحادية و مكتب الارشاد و أو الحديث عن الشرعية و بعدها حصار المحكمة الدستورية من نفس الناس و غيرها من الاحداث.

لاحظت أننا بقينا قاسيين أوى في بعض المواقف (وأنا منهم). زي شماتة بعض الناس في موت بعض الإخوان و أعوانهم أو وفاة متظاهرين ضد الإخوان و الردود الي بتتقال زي "احسن" أو "إيه الي وداهم هناك" و الكلام ده.

و لاحظت... و لاحظت... و لاحظت...

قبل لما نبرر لنفسنا التصرفات دي (حتي في عقلنا دلوقتي) و نبتدي نقول حاجات زي " إحنا بنقول و بنعمل كده علشان هما جبهة خراب و عملاء او مش عاوزين الشريعة تتطبق" او " إحنا بنقول و بنعمل كده علشان أصل دول كدابين و بتوع عشيرتهم بس و بهدلو البلد"، أعتقد أننا كافراد (أو علي الأقل أنا حقول لنفسي) لازم نفتكر كلمة عمر المختار (حتي لوكانت جزء من الفلم بس): "إنهم ليسو قدوة لنا".

من الأخر، كل الي حوالينا ده حيزول في يوم من الأيام و حيفضل أدام ربنا و حتي أدام نفسنا "إحنا عملنا و قلنا إيه في حياتنا".
طبعا لازم نعترض. و طبعا  لازم نخالف الي شايفينو غلط و ندافع عن الحق من وجهة نظرنا.
بس أعتقد إننا لازم نحاول (و اتمني ربنا يوفقنا) علي اد منقدر منوصلش لمرحلة الكلمة دي:

وإذا خاصم فجر.... وإذا خاصم فجر...

سموها سذاجة... سموها  سطحية... سموها زي متسموها. المهم تفكروا فيها

Mood: Concerned :| 

Tuesday, March 19, 2013

يوميات الرجل المصري... (شيء في صدري... و في كليتي أحيانا!)

الأربعين "إنت" التي لا يخلو منها بيت الزوجية...

إنت ما بتسألش عليا ليه؟
إنت مبتتكلمش معايا ليه؟
إنت بتكلمني ببرود كده ليه؟
إنت بتكلمني بزعيق كده ليه؟
إنت مش فاهمني علي فكرة !
إنت قصدك إيه من الي كتبته علي الفيس بوك؟
إنت بتعمل كده ليه؟
إنت مبتعملش كده ليه؟
إنت مبسوط كده ليه؟؟؟؟؟؟
إنت مبتساعدنيش خالص!
إنت كإنك مش عايش معانا!
إنت مبتحطش إيدك في البيت خالص!
إنت عمرك ما ساعدت في حاجة للعيال!
إنت كنت حتعمل إيه من غيري مش فاهمة!
إنت مش حتزود الفلوس بقي؟
إنت لازم تيجي معايا المشوار ده!
إنت لازم تفضي نفسك و تزور قرايبي معايا!
إنت متضايق أوي يعني إنك بقالك أسبوع بتجيب دليفري؟ أعملك إيه مفيش طبيخ!
إنت بتشتكي ليه، فيها إيه لو غسيلك بقالو إسبوعين في الغسالة؟
إنت دايما كده، تقلب كل حاجة عليا. فيها إيه يعني لما أصرخ في البيت طول الوقت؟
إنت مش حتبطل بخلك ده؟ ليه مستغرب إني إشتريت بلوفر جديد غير التمنتاشر الي عندي في الدولاب؟
إنت مستغرب ليه؟ أيوه، الشنطة الديور بتاعتي فات عليها شهرين و  بالنسبالي بقت قديمة. فيها ايه يعني؟
إنت حتفضل كل يوم تتفرج علي متشات الكورة ؟
إنت مش حتبطل لعب بلايستاشن؟
إنت حتخرج مع صحابك تاني؟ مش كفاية إنك خرجت الشهر الي فات؟!
إنت ليه دايما مع صحابك بتضحك و معايا لأ؟
إنت متروق كده و رايح علي فين إن شاء الله؟
إنت إتأخرت ليه؟
إنت جيت بدري ليه؟
إنت كنت فين؟
إنت بتكلم مين؟
إنت أساسا مين؟؟؟؟
إنت فرحان بنفسك كده ليه؟
إنت مالك ظريف كده ليه مع الستات التانية؟
إنت تعرف الست دي منين؟
إنت بتهزر مع الست دي كده ليه؟ أنا مبرتحلهاش!
إنت بتبصلها كده ليه؟
إنت عاجبك فيها إيه دي؟ دي حتى شكلها بلدي و بتحط "ميكاب" كتير!
إنت و كل الرجالة كده... عينكو فارغة ومابتفهموش في الستات!
إنت إيه حكايتك؟ فضيالك أنا بقي علشان أفضل ألبسلك كعب عالي وأرقصلك بلدي في البيت؟ إيه البلاوي دي!

لأ و إيه، بعد كل ده تلاقيها بمنتهى التمكن تقولك:
إنت مبقتش تحبني زي زمان ليه؟
؟؟؟؟؟!!!!!!!

رد إنت بقي يا حسين!!