Thursday, March 21, 2013

عن الخرفان و النعاج و أنا... كفاية!

بقالي فترة بفكر بهدوء في المشادات و المشاحنات الي بين الناس علي الفيس بوك أو وجها لوجه (ولي أنا منكرش طبعا إني كنت طرف فيها مع ناس) أو الإعلام بسبب السياسة و غيرها.

و بغض النظر عن مين صح و مين غلط في كل حدث علي حده، بس عمال يجي في بالي كلمة موجودة في الحديث ده:
"أربع من كن فيه كان منافقاً خالصاً، ومن كانت فيه خصلة منهن كانت فيه خصلة من النفاق حتى يدعها، إذا اؤتمن خان، وإذا حدث كذب، وإذا عاهد غدر، وإذا خاصم فجر."

"وإذا خاصم فجر"
الكلمة دي قلقاني شوية علي نفسي و علي ناس كتير بحبهم و بخاف عليهم (أهل، أصحاب، أحباب... الخ).

لاحظت أننا بقينا مش موضوعيين في أحيان كتيرة (وأنا منهم) و بقينا علي إستعداد نصدق أي هتش (أي كلام) وأتهامات بدون دليل بس علشان بنكره شخص أو جبهة أو حزب . زي مثلا السولار مختفي لأنه كله في غزة (علي أساس إن غزة أو تعدادها أد مصر و تعدادها!) أو الكلام عن صهيونية البرادعي العميل أو اد إيه عيلة ساويرس حرامية ... و كل الاتهامات الي مثلها و الكلام مطلق بدون دليل (دليل قاطع مثبت من مصدر موثوق أو حكم محكمة).

لاحظت أننا بقينا بنتريق (وأنا منهم) علي الأشخاص بمنتها البساطة زي الكلام عن الخرفان أو عن الخنازير و النعاج. و الأسواء إننا بقينا بنلسن حتي علي البيوت و الأعراض زي التلسين علي بنت البردعي أو أم أيمن أو ام كباسين و ابو حملات و ابو جهل (خيرت ولي معاه) و سلطانية مرسي و لبس عبد الناصر و ناس تانية ياما.

لاحظت أننا بقينا بنشوف العدل و الحق و المساواة  في القصاص بعين أه و عين لأ (وأنا منهم). زي حرق مقرات الإخوان مثلا أو ضرب المتظاهرين عند الاتحادية و مكتب الارشاد و أو الحديث عن الشرعية و بعدها حصار المحكمة الدستورية من نفس الناس و غيرها من الاحداث.

لاحظت أننا بقينا قاسيين أوى في بعض المواقف (وأنا منهم). زي شماتة بعض الناس في موت بعض الإخوان و أعوانهم أو وفاة متظاهرين ضد الإخوان و الردود الي بتتقال زي "احسن" أو "إيه الي وداهم هناك" و الكلام ده.

و لاحظت... و لاحظت... و لاحظت...

قبل لما نبرر لنفسنا التصرفات دي (حتي في عقلنا دلوقتي) و نبتدي نقول حاجات زي " إحنا بنقول و بنعمل كده علشان هما جبهة خراب و عملاء او مش عاوزين الشريعة تتطبق" او " إحنا بنقول و بنعمل كده علشان أصل دول كدابين و بتوع عشيرتهم بس و بهدلو البلد"، أعتقد أننا كافراد (أو علي الأقل أنا حقول لنفسي) لازم نفتكر كلمة عمر المختار (حتي لوكانت جزء من الفلم بس): "إنهم ليسو قدوة لنا".

من الأخر، كل الي حوالينا ده حيزول في يوم من الأيام و حيفضل أدام ربنا و حتي أدام نفسنا "إحنا عملنا و قلنا إيه في حياتنا".
طبعا لازم نعترض. و طبعا  لازم نخالف الي شايفينو غلط و ندافع عن الحق من وجهة نظرنا.
بس أعتقد إننا لازم نحاول (و اتمني ربنا يوفقنا) علي اد منقدر منوصلش لمرحلة الكلمة دي:

وإذا خاصم فجر.... وإذا خاصم فجر...

سموها سذاجة... سموها  سطحية... سموها زي متسموها. المهم تفكروا فيها

Mood: Concerned :| 

Tuesday, March 19, 2013

يوميات الرجل المصري... (شيء في صدري... و في كليتي أحيانا!)

الأربعين "إنت" التي لا يخلو منها بيت الزوجية...

إنت ما بتسألش عليا ليه؟
إنت مبتتكلمش معايا ليه؟
إنت بتكلمني ببرود كده ليه؟
إنت بتكلمني بزعيق كده ليه؟
إنت مش فاهمني علي فكرة !
إنت قصدك إيه من الي كتبته علي الفيس بوك؟
إنت بتعمل كده ليه؟
إنت مبتعملش كده ليه؟
إنت مبسوط كده ليه؟؟؟؟؟؟
إنت مبتساعدنيش خالص!
إنت كإنك مش عايش معانا!
إنت مبتحطش إيدك في البيت خالص!
إنت عمرك ما ساعدت في حاجة للعيال!
إنت كنت حتعمل إيه من غيري مش فاهمة!
إنت مش حتزود الفلوس بقي؟
إنت لازم تيجي معايا المشوار ده!
إنت لازم تفضي نفسك و تزور قرايبي معايا!
إنت متضايق أوي يعني إنك بقالك أسبوع بتجيب دليفري؟ أعملك إيه مفيش طبيخ!
إنت بتشتكي ليه، فيها إيه لو غسيلك بقالو إسبوعين في الغسالة؟
إنت دايما كده، تقلب كل حاجة عليا. فيها إيه يعني لما أصرخ في البيت طول الوقت؟
إنت مش حتبطل بخلك ده؟ ليه مستغرب إني إشتريت بلوفر جديد غير التمنتاشر الي عندي في الدولاب؟
إنت مستغرب ليه؟ أيوه، الشنطة الديور بتاعتي فات عليها شهرين و  بالنسبالي بقت قديمة. فيها ايه يعني؟
إنت حتفضل كل يوم تتفرج علي متشات الكورة ؟
إنت مش حتبطل لعب بلايستاشن؟
إنت حتخرج مع صحابك تاني؟ مش كفاية إنك خرجت الشهر الي فات؟!
إنت ليه دايما مع صحابك بتضحك و معايا لأ؟
إنت متروق كده و رايح علي فين إن شاء الله؟
إنت إتأخرت ليه؟
إنت جيت بدري ليه؟
إنت كنت فين؟
إنت بتكلم مين؟
إنت أساسا مين؟؟؟؟
إنت فرحان بنفسك كده ليه؟
إنت مالك ظريف كده ليه مع الستات التانية؟
إنت تعرف الست دي منين؟
إنت بتهزر مع الست دي كده ليه؟ أنا مبرتحلهاش!
إنت بتبصلها كده ليه؟
إنت عاجبك فيها إيه دي؟ دي حتى شكلها بلدي و بتحط "ميكاب" كتير!
إنت و كل الرجالة كده... عينكو فارغة ومابتفهموش في الستات!
إنت إيه حكايتك؟ فضيالك أنا بقي علشان أفضل ألبسلك كعب عالي وأرقصلك بلدي في البيت؟ إيه البلاوي دي!

لأ و إيه، بعد كل ده تلاقيها بمنتهى التمكن تقولك:
إنت مبقتش تحبني زي زمان ليه؟
؟؟؟؟؟!!!!!!!

رد إنت بقي يا حسين!!